SMT - FRÉTTIR:

24. jan. 2012. Nú er búið að setja inn á síðuna kennsluáætlun vorannar fyrir Regnboga. Byrjað var að kenna yfirreglurnar fjórar núna í janúar og svo er bætt við smám saman fram í maí. Innlögnin hefur gengið ljómandi vel það sem af er og börnin voða ánægð með Bros-orminn sinn sem vex og dafnar samhliða því sem þau tileinka sér að nota innirödd, fara eftir fyrirmælum, ganga vel um og gæta handa sinna og fóta :-) Sjá hér
Á Sól og Mána ætlum við að leggja megináherslu á yfirreglurnar fjórar á vorönn ásamt því að vinna markvissar með lausnaleit og leggja áherslu á heimspekilega gagnrýna umræðu um það sem snýr að  siðferðisvitund, eigin tilfinningum og annarra og efla með því félagsfærni barnanna og hæfileikann að setja sig í spor annarra. Ekki er áætlað að vera með sérstaka SMT umbun á önninni eins og verið hefur heldur vinna enn meira með félagslegu hvatninguna.

4. okt. 2011.Nú erum við byrjuð að rifja upp og æfa yfirreglurnar og einveruferlið með börnunum á Sól og Mána. Kennsluáætlun fyrir haustönn má skoða hér fyrir ofan. Á Regnboga verður unnið í anda SMT en ekki byrjað að kenna reglur fyrr en á vorönn 2012.

4. okt. 2011. Áslaug kennari á Sól fer á grunnnámskeið í PMT foreldrafærni í vetur. Alls eru þetta fjórar lotur, tveir dagar í senn. Tvær lotur verða fyrir áramót og tvær á vorönn. Áslaug er áttundi kennarinn frá Pálmholti sem sækir grunnmenntunina.

14. júní 2011. Undanfarnar vikur höfum við verið að vinna með SMT- lausnaleit. Það er eitt af verkfærunum sem SMT- skólafærnin notast við. Með þessu verkfæri er leitast við að fá börn og kennara til að leysa vandamál sem upp koma í skólastarfinu saman. Börnin á Mána gerðu samning um að nota inniröddina til að koma í veg fyrir óþarfa hávaða. Börnin komu sér saman um hvaða leiðir best væri að fara. Kennararnir aðstoðuðu þau við að meta kosti og galla leiðanna, t.d. komumst við að því að ekki er hægt að "taka munninn af". Eftir að kennari skrifaði samninginn niður, skrifuðu börnin undir hann annað hvort með nafninu sínu, upphafsstöfum eða fingrafari. Börnin fengu bros þegar vel gekk og endaði það með umbun núna 14. júní en þá fengu börnin að baka skúffuköku. Myndir hér.

22. feb.2011 Nú er Hafdís byrjuð á PMT- grunnnámskeiði og mun sækja fjórar tveggja daga lotur á vorönninni. Fyrsta lotan er búin en næstu lotur eru 2. og 3. mars, 4.og 5. apríl og 12. og 13. maí. Hafdís er sjöundi starfsmaðurinn sem sækir þessa grunnmenntun í PMT þannig að ekki er hægt að segja annað en að skólinn búi vel að þessu leyti. Sigrún Ella byrjaði námið í haust en þurfti að hætta vegna veikinda.

20. janúar 2011. Við höldum ótrauð áfram með SMT- skólafærnina okkar og erum nú búin að gera kennsluáætlun fyrir vorönnina. Á Regnboga er verið að byrja að leggja inn fyrstu reglurnar en á Sól og Mána er haldið áfram að rifja upp reglur og viðhalda jákvæðum aga ásamt því að bæta við lausnaleit síðar á önninni. Allt gengur þetta ljómandi vel og hefur góð áhrif á skólaandann.

22. sept. 2010. Á haustönn mun Sigrún Ella Meldal sækja grunnnámskeið í PMT-foreldrafærni og er hún sjöundi starfsmaðurinn frá Pálmholti sem sækir námskeiðið sem skiptist í fjórar tveggja daga lotur.

22. sept. 2010. Nú er búið að vinna upp áætlun fyrir kennslu og upprifjun á SMT skólafærninni okkar fyrir haustönnina. Máni og Sól hafa sitt hvora áætlunina en á Regnboga bíðum við með innlögn þar til eftir áramótin. Foreldrar allra nýnema fengu kynningu á agastefnu leikskólans í september. Eins og sjá má í áætluninni er verið að draga úr hvatningu í formi brosa en þess í stað lögð mun meiri áhersla á félagslegu hvatninguna. Hér má sjá áætlanirnar fyrir Sól og Mána

10. mars 2010. Í lok nóvember 2009 lukum við innlögn á öllum SMT - reglum skólans bæði á Regnboga og Sól. Máni byrjaði frá grunni með innlögn fyrir yngstu börnin enda voru þau að kynnast agastefnu skólans. Innlögn gekk mjög vel og börnin fljót að tileinka sér reglurnar. Börnin söfnuðu Brosum og fylltist ormurinn á Mána, hjartað á Regnboga og staukarnir á Sól jafnt og þétt við hverja innlagða reglu. Eftir áramótin hafa kennarar verið að fara yfir reglurnar og velta fyrir sér hvort hægt sé að sleppa einhverjum reglum eða sameina tvær reglur í eina. Niðurstaðan var sú að reglum var fækkað úr 33 í 17 reglur. Undanfarnar vikur höfum við verið að rifja upp yfirreglurnar með börnunum og hefur það gengið mjög vel. Á næstu vikum er áætlað að fara vel yfir mörkin og æfa einveruferlið með börnunum. Á teglunum hér fyrir ofan er búið að setja inn nýja reglutöflu sem og myndir af þeim reglum sem nú eru í gildi.

11. sept 2009. Á vorönn innleiddum við 19 reglur samanber kennsluáætlun vorannar sem sjá má hér fyrir neðan. Innlögnin gekk mjög vel enda flest allt reglur sem börnin þekkja úr skólanum. Með innlögninni festust reglurnar enn betur í sessi og svo var óneitanlega hvetjandi að fá umbun í formi brosmerkja og sameiginlega umbun í lok hverrar innlagnar. Börnin hafa sem sagt verið til fyrirmyndar en það að vera til fyrirmyndar er einmitt SMT- slagorð Pálmholts. Þann 14. september byrjum við með innlögn þar sem frá var horfið og miðum við að ljúka innlögn fyrir Sól og Regnboga í byrjun desember. Sjá kennsluáætlun haustannar 2009 fyrir Sól og Regnboga hér. Á Mána eru börnin öll nýbyrjuð og þekkja hvorki reglurnar né innlagnarferlið þannig að þar verður byrjað frá grunni. Hér má sjá kennsluáætlun haustannar 2009 fyrirMána.

21. jan.2009. Í næstu viku munum við hefja innleiðingu á SMT-skólafærni. SMT-teymi skólans er búið að vinna upp þrjár yfirreglur sem og 32 reglur sem eiga við mismunandi námsvið/viðfangsefni og svæði innan skólans.

Yfirreglur eru:

1. Að fara eftir fyrirmælum
2. Að gæta handa sinna og fóta
3. Að nota inniröddina

Hér má sjá allar SMT- reglurnar og viðeigandi myndir

Kennsluáætlun vorannar 2009. Sjá hér

Öll kennsla fer fram gegnum leik og æfingar. Fyrst er reglan kennd/leikin eins og ætlast er til að farið sé eftir henni. Síðan er sýnt hvernig ekki á að fara eftir reglunni og börnin spurð hvort verið sé að framfylgja reglunni. Að  lokum er alltaf sýnd sú hegðun sem verið er að kenna og þykir til fyrirmyndar. Með SMT- innlögn erum við ekki að gera neinar stórkostlegar breytingar á aga eða hegðunarmótun frá því sem verið hefur. Það sem er jákvætt við SMT- skólafærni er að hún er styðjandi við hegðun barnsins og samræmir viðbrögð kennara gagnvart hegðun, bæði æskilegri og óæskilegri. Við munum innleiða yfirreglurnar þrjár í næstu viku og taka okkur tvær vikur í kennslu, æfingu, hrós og umbun. Síðan verða innleiddar reglur fyrir hvert svæði/námsvið á þriggja vikna fresti. Í lok hverrar innlagnar er gert ráð fyrir að börnin fái umbun sem þau hafa valið sér í samráði við kennara á hverri deild. Hver deild safnar sér brosandlitum sem sett eru upp á hverri deild og þegar ákveðnum fjölda er náð er haldið upp á áfangann með t. d. poppveislu, gönguferð á bókasafnið o.s.frv. Hér má sjá hvernig við settum upp hvatninguna sem er eitt af verkfærum SMT- skólafærni. Annað verkfæri í SMT- skólafærni eru skýr fyrirmæli. Þriðja verkfærið sem við höfum aðlagað að okkar skóla er mörk. Við hvetjum foreldra til að kynna sér vel þessi SMT- verkfæri og hvernig við hyggjusmst innleiða SMT- skólafærnina. Áætlun á innleiðingu reglna verður sett inn á síðuna innan skamms.

Hér má finna nokkur hagnýt uppeldisráð til foreldra. PMT-uppeldisrád til foreldra

31. okt. 2008. Nú er undirbúningsvinna vegna SMT langt komin hjá okkur og áætlum við að halda fund með foreldrum  á vorönn 2009 þar sem okkar útfærsla á SMT-skólafærni verður kynnt. Einnig ætlum við að vera dugleg að setja upplýsingar um framgang mála inn á þennan tengil. SMT-teymið hefur haldist óbreytt frá upphafi og fundað reglulega síðast liðið eitt og hálft ár. Mesta vinnan hefur farið í að semja og samræma reglur fyrir öll svæði skólans og setja upp sérstaka reglutöflu, velja myndir fyrir hverja reglu, ræða um hvatningu, mörk, umbun og skýr fyrirmæli. Seinni hluta nóvember er ætlunin að gera skráningar á því sem við köllum meiri háttar hegðunarbrot og minniháttar hegðunarbrot.

Minniháttar hegðunarfrávik geta verið:

•  að hunsa fyrirmæli

• trufla

• rífa af

• skemma fyrir öðrum

• stugga við

• ljótt orðbragð

• léttvæg stríðni, s.s. að ulla, geifla sig, pota

• ögra

• særa

Meiriháttar hegðunarfrávik geta verið:

• síendurtekin brot á reglu

• lemja

• að bíta

• harkalegar hrindingar

• grjótkast

• annað ofbeldi

• að skemma hluti vísvitandi

• særa vísvitandi

Allir starfsmenn á deildum munu skrá hegðunarbrot í tvær vikur. Þetta er gert til að hafa samanburð fyrir innlögn og síðan verða gerðar skráningar aftur þegar búið er að leggja inn reglur og vinna með þær. Þannig getum við mælt og borið saman árangur innlagnarinnar.

Upphafið

Haustið 2007 hóf leikskólinn Pálmholt undirbúning að innleiðslu á SMT - skólafærni (School management training) eða jákvæðum stuðningi við hegðun nemenda. SMT - skólafærni er útfærsla á bandarísku aðferðinni Positive Behavior Support /PBS. SMT er hliðstæð aðferð og PMT - foreldrafærni (Parent management training) þar sem lögð er áhersla á að koma í veg fyrir og draga úr hegðunarvanda með því að kenna og þjálfa félagsfærni, umbuna fyrir æskilega hegðun og samræma vinnubrögð starfsfólks gagnvart nemendum sem sýna óæskilega hegðun. Innleiðsla SMT - skólafærni tekur þrjú til fimm ár og mun starfsfólk skólans nota veturinn undirbúnings. Vorið 2007 sótti allt starfsfólk leikskólans námskeið þar sem SMT og PMT var kynnt.

Stofnað hefur verið SMT teymi við leikskólann sem undirbýr og annast innleiðslu aðferðarinnar í skólann. Verkefnisstjóri er Sesselja Sigurðardóttir leikskólaráðgjafi á skóladeild. Þrír fulltrúar í teyminu hafa loki PMT grunnmenntun og sá fjórði lýkur sinni grunnmenntun í janúar 2009. Stefnt er að því að allir aðilar innan teymisisns sæki sér grunnmenntun í aðferðum PMT.